Աֆղանստանի մայրաքաղաք Քաբուլի մոտակայքում, Քարղա լճի մոտ գտնվող հյուրանոցներից մեկի ուղղությամբ թալիբների կողմից իրականացված գրոհի պատճառով զոհվել է առնվազն 18 մարդ: Իշխանությունների համաձայն, Սփոժմանի հյուրանոցի այսօր առավոտյան ավարտված՝ 12 ժամ տեւած գրոհի ընթացքում զոհվել է հյուրանոցի երեք պահակ, ոստիկանության ծառայող եւ քաղաքացիական 12 անձ: Ձերբակալվել են հինգ ահաբեկիչներ: Թալիբների գրոհայիններն ու ինքնասպան ահաբեկիչները պատանդ էին վերցրել քաղաքացիական անձանց, ներառյալ կանանց եւ երեխաների: Մինչեւ գրոհի ավարտը Աֆղանստանի անվտանգության ուժերն ազատ են արձակել պատանդ վերցրած 35 անձանց: Անվտանգության ուժերի կողմից ձեռնարկված գործողությունների արդյունքում ոչնչացվել են հյուրանոցի գրոհն իրականացրած բոլոր զինյալները: Թալիբների խոսնակի համաձայն, թալիբները պատասխանատվություն են ստանձնել այս հարձակման համար, որի թիրախը եղել է օտարերկրացիների կողմից օգտագործվող հյուրանոցը: Երկրի ոստիկանությունը հայտնել է, որ նռնակներով եւ Կալաշնիկովի ինքնաձիգներով զինված թալիբների զինյալները հարձակում են կատարել Քարղա լճի ափին գտնվող հյուրանոցի վրա, որտեղ բազմաթիվ հյուրեր եւ ընտանիքներ հավաքվել էին՝ խնջույք անցկացնելու համար:
