ԱՄՆ Հետաքննությունների դաշնային բյուրոն ձերբակալել է CIA-ի նախկին աշխատակցին գաղտնի տեղեկությունները լրատվամիջոցներին փոխանցելու համար: Նա մեղադրվում է Ալ-Քաիդայի պարագլուխներից մեկի ձերբակալման գործողությանը մասնակցող գործակալներից մեկին բացահայտելու մեջ: Մինչեւ վերջնական որոշում կայացնելը 47-ամյա ջան Կիրիակուն ազատության մեջ է 250 հազար դոլար գրավի դիմաց: Ջան Կիրիակուին, ով CIA-ում աշխատել է 1990-2004 թթ. մեղադրում են ԱՄՆ տարածքում ահաբեկչական կազմակերպությունների դեմ աշխատող գաղտնի գործակալի ինքնության բացահայտման մեջ: Բացի այդ, Կիրիակուն բացահայտել է մեկ այլ գործակալի, ով ներգրավված է եղել Ալ-Քաիդայի պարագլուխներից Աբու Զուբեյդի ձերբակալման
գործողության մեջ: Քննության տվյալներով, լրագրողները ստացած տեղեկությունները փոխանցել են ահաբեկչության մեջ մեղադրվողների փաստաբաններին: Կիրիակուն կկանգնի Վըրջինիայի դատարանի առջեւ: Նախկին գործակալը հերքում է բոլոր մեղադրանքները: Եթե նրան մեղավոր ճանաչեն, կդատապարտեն մինչեւ 5 տարվա ազատազրկման: